இஸ்லாமிய திருமண முறை

முஸ்லிம் தேடும் மனைவி பெண்ணைக் குறித்தும் திருமணத்தைக் குறித்தும் இஸ்லாம் போதிக்கும் உயர்வான கண்ணோட்டத்தின்படி செயல்பட விரும்பும் ஒரு முஸ்லிமை, வெறும் வெளி அலங்காரங்களை மட்டுமே கொண்ட இந்தக் கால இளம் பெண்கள் எவரும் கவர்ந்திட முடியாது. மாறாக, முழுமையான மார்க்கப்பற்றுள்ள பெண்கள்தான் அந்த முஸ்லிமை ஈர்க்க முடியும். ஆகவே, தமது வாழ்க்கைத் துணையைத் தேர்ந்தெடுப்பதில் தம் மண வாழ்வை நிம்மதியானதாகவும், மகிழ்ச்சி கரமானதாகவும் ஆக்கக்கூடிய இஸ்லாமிய நற்பண்புகள் மிக்க பெண்ணையே அவர் தேர்ந்தெடுப்பார் அதில் நிதானத்தையும் கடைப்பிடிப்பார். கொள்கையற்று வீணான இளைஞர்களைப் போன்று வெறும் அழகையும், அலங்காரத்தையும், கவர்ச்சி யையும் மட்டுமே அவர் நோக்கமாகக் கொள்ளமாட்டார். அதற்கெல்லாம் மேலாக உறுதிமிக்க மார்க்கப்பற்று, சிறந்த அறிவு, அழகிய பண்பாடுகளை உடைய பெண்ணைத் தான் முஸ்லிம் தேடுவார். மேலும், இது விஷயத்தில் நபி அவர்களின் வழிகாட்டுதலை கருத்தில் கொள்வார்.
நபி அவர்கள் கூறினார்கள்: "நான்கு (நோக்கங்களு)க்காக ஒரு பெண் மணமுடிக் கப்படுகிறாள். அவளது செல்வத்துக்காக, அவளது குடும்பப் பாரம்பரியத்துக்காக, அவளது அழகுக்காக, அவளது மார்க்கத்திற்காக. நீ மார்க்கமுடையவளையே தேடிப் பெற்றுக் கொள்! உன் இருகரங்களும் மண்ணாகட்டும்!'' (ஸஹீஹுல் புகாரி, ஸஹீஹ் முஸ்லிம்)
(வாழ்த்துகிற பொழுது ‘உன் இருகரங்கள் மண்ணாகட்டும், உன் நெற்றி மண்ணாகட்டும்' என்றெல்லாம் நபி அவர்கள் கூறுவார்கள். அதற்கு அதிகமதிகம் அல்லாஹ்விற்குச் சிரம் பணி(ந்து ஸஜ்தா செய்)யட்டும் என்பது பொருளாகும்.)
மார்க்கத்தைப் பேணக்கூடிய பெண்ணைத் தேர்ந்தெடுத்துக் கொள்ளுமாறு நபி அவர்கள் முஸ்லிம் இளைஞர்களுக்கு உபதேசித்தது, அழகான பெண்ணைத் தேர்ந்தெடுக்கக்கூடாது என்ற கருத்தில் அல்ல. ஏனென்றால், நபி அவர்கள் திருமணத்துக்கு முன் பெண்ணைப் பார்த்துக் கொள்வதும் விரும்பத்தக்கதே என்று கூறியிருக்கிறார்கள். ஒரு முஸ்லிம் தமது மனதுக்கு மகிழ்ச்சியளிக்காத, கண்களுக்குக் குளிர்ச்சி அளிக்காத பெண்ணை மணந்து சிரமத்தில் மாட்டிக் கொள்ளக்கூடாது என்பதற்காகவே திருமணத்திற்கு முன் பெண்ணைப் பார்த்துக்கொள்ளவும் நபி அவர்கள் கட்டளையிட்டார்கள்.
முகீரா இப்னு ஷஃஅபா (ரழி) அவர்கள் கூறுகிறார்கள்: நபி அவர்களின் காலத்தில், நான் ஒரு பெண்ணை மணம் முடிக்கப் பேசினேன். நபி அவர்கள் ‘அந்தப் பெண்ணைப் பார்த்தீரா?' என்று கேட்டார்கள். நான் ‘இல்லை' என்றேன். அதற்கு நபி அவர்கள் அவளைப் பார்த்துக் கொள்! அது உங்களிடையே நேசத்தை ஏற்படுத்துவதற்கு மிக ஏற்றமாக இருக்கும்'' என்று கூறினார்கள். (ஸுனனுன் நஸயி)
அன்சாரிப் பெண்ணை மணந்து கொள்ள இருந்த ஒருவர் நபி அவர்களிடம் வந்தார். நபி அவர்கள், அவரிடம் ‘அப்பெண்ணைப் பார்த்தாயா?' என்று கேட்டார்கள். அவர் ‘இல்லை' என்றார். ‘அப்பெண்ணைப் பார்த்துக் கொள்!' என அவருக்கு நபி கட்டளையிட்டார்கள். (ஸுனனுன் நஸயி)
ஒரு நல்ல பெண்ணிடம், விரும்பத்தகுந்த ஆன்மிகப் பண்புகளை ஓர் ஆண் எதிர்பார்ப்பது போன்றே அவள் அழகானவளாகவும் இருக்க வேண்டும் என்று எதிர்பார்ப்பதும் இயற்கையான ஒன்றுதான். இதை நபி அவர்கள் பல ஹதீஸ்களில் உறுதிப்படுத்தியுள்ளார்கள். இந்த இரண்டில் ஒன்று இருப்பதால் மற்றொன்று தேவையில்லை என்றாக முடியாது.
இதனால்தான் நபி அவர்கள் இப்னு அப்பாஸ் (ரழி) அவர்களுக்குக் கூறினார்கள்: "மனிதன் பொக்கிஷமாகக் கருத வேண்டியதில் மிகச் சிறந்ததை நான் உமக்கு அறிவிக்கட்டுமா? (அதுதான்) நல்ல பெண். கணவர் அவளைப் பார்த்தால், அவள் அவரை மகிழ்விப்பாள். அவர் கட்டளையிட்டால் ஏற்று நடப்பாள். அவர் அவளைவிட்டும் சென்றுவிட்டால் அவரைப் பாதுகாத்துக் கொள்வாள்.'' (முஸ்தத்ரகுல் ஹாகிம்)
(இந்த இடத்தில், மனைவி தனது கற்பைப் பாதுகாப்பதையே கணவரைப் பாதுகாப்பதென்று நபி அவர்கள் குறிப்பிட்டிருக்கிறார்கள்.)
அபூஹுரைரா (ரழி) அவர்கள் அறிவிக்கிறார்கள்: நபி அவர்களிடம் 'பெண்களில் மிகச் சிறந்தவர் யார்?' என கேட்கப்பட்டது. அதற்கு நபி அவர்கள், 'கணவர் அவளைப் பார்த்தால் மகிழ்விப்பாள். அவர் ஏவினால் கட்டுப்படுவாள். அவரது பொருளிலும் அவளது ஆன்மாவிலும் அவர் வெறுக்கும் காரியங்களிலும் அவருக்கு மாறு செய்ய மாட்டாள்' என்று கூறினார்கள். (முஸ்னது அஹ்மது)
கணவருக்கு நிம்மதியையும் மகிழ்ச்சி யையும் நற்பாக்கியத்தையும் வழங்க ஆற்றல் பெற்ற மனைவியின் தனித்தன்மையைப் பற்றி நபியவர்களின் உயர்ந்த கண்ணோட்டமாகும் இது. இத்தகைய பெண்ணே இல்லறத்தில் திருப்தி, அமைதி, மன மகிழ்ச்சி மற்றும் உற்சாகத்தை வழங்கவும் ஆற்றல் பெற்றவள். அது மட்டுமின்றி பல தலைமுறைகளுக்குச் சிறந்த பயிற்சியாளராகவும் வீரர்களை உருவாக்குபவராகவும் மேதைகளை உற்பத்தி செய்பவராகவும் விளங்குவாள்.
உடல், உணர்வு, ஆன்மா, அறிவின் தேட்டங்களுக்கு ஏற்ப உறுதிமிக்க, சமநிலை பெற்ற அடிப்படையின் மீதே திருமணம் என்ற மாளிகை நிர்மாணிக்கப்பட வேண்டுமென நபி அவர்கள் ஆசைப்பட்டார்கள். அப்போதுதான் திருமண உறவு பலமாக அமைந்து வெறுப்புணர்வும் மனக்கசப்பும் அதை அசைத்து விட முடியாமல் இருக்கும். ஆகவே, எல்லா நிலையிலும் அல்லாஹ்வின் மார்க்கத்தையே பின்பற்றும் உண்மை முஸ்லிம் தீயகுணமுள்ள அழகிய பெண்ணின் வலையில் சிக்கிவிடமாட்டார். மாறாக, அவளைவிட்டும் தாமும் விலகி மக்களையும் எச்சரிப்பார்.

இஸ்லாமிய திருமண முறை

இஸ்லாமிய திருமண முறை
--------------------------------------------------------------------------------
திருமணம் என்பது தம்பதிகள் தங்களுக்குள் செய்து கொள்ளுகின்றதொரு வாழ்க்கை ஒப்பந்தம் என்பது மட்டுமல்ல. அது தம்பதிகள் இறைவனுடன் செய்து கொள்ளும் ஒரு ஒப்பந்தமாகும். பொறுப்புடன் வாழ விரும்புவோரின் பொறுப்புள்ள இறை உணர்வின் வெளிப்பாடாகும்.
மக்கள் பெண் பார்க்கும் போது இஸ்லாத்தைக் கடைபிடிக்கின்ற பெண்ணாகப் பார்க்க வேண்டும். அதைப் போன்று மணமகனைப் பார்த்தாலும் இஸ்லாத்தைக் கடைபிடிக்கின்ற ஆணாகப் பார்க்க வேண்டும். ஏதோ திருமணம் செய்ய வேண்டுமே என்று திண்ணையில் தூங்கிக் கொண்டு இருப்பவனுக்கு திருமணம் முடிக்கக் கூடாது. தன்னையே காப்பாற்றிக் கொள்ள இயலாதவர்களுக்கு திருமணம் செய்து வைத்து, பெண்ணுடைய வாழ்க்கையை வீணடிக்கக் கூடாது. திருமணம் செய்தால் திருந்தி விடுவான் என்ற சிலர் சில ஆண்களுக்கு திருமணம் செய்கின்றார்கள். அவ்வாறு செய்து பெண்ணின் வாழ்க்கையை விஷப்பரீட்சையாக ஆக்கக் கூடாது.
இஸ்லாம் வழங்கும் திருமணச்சட்டங்கள் ஆண், பெண் இருபாலருக்கும் சம அளவில் பொருந்துவதாகும். எடுத்துக்காட்டாக, பிரம்மாச்சாரியத்தைக் குறிப்பிடலாம்.
பிரம்மச்சாரியம் என்பது ஆண்களுக்கு எப்படி ஆகாதோ அதைப் போன்று பெண்களுக்கும் ஆகாது என்கின்றது. இஸ்லாம் பெண்களைப் பொறுத்தவரை திருமணங்கள் ஆண்களை விட முக்கியமானதாகும்.
ஆணைப் பொறுத்தவரை தன்னைக் காப்பாற்றிக் கொள்ளத் தெரிய வேண்டும். மணம் முடித்ததும் மனைவியை காப்பாற்ற முடியும் என்ற நம்பிக்கை இருந்தால் தான் திருமணம் செய்ய வேண்டும்.நபி(ஸல்) அவர்கள் கூறியுள்ளார்கள்.
உங்களின் யார் திருமணத்திற்கான செலவினங்களுக்குச் சக்தி பெற்றிருக்கிறாரோ அவர் திருமணம் (அந்நியப் பெண்களைப் பார்ப்பதை விட்டும்) பார்வையை கட்டுப்படுத்தும் கற்பைக் காக்கும் யார் அதற்குச் சக்தி பெறவில்லையோ அவர் நோன்பு நோற்கட்டும் அது அவரது இச்சையைக் கட்டுப்படுத்தும். ஆதாரம் : புகாரி
இவ்வாறெல்லாம் சொல்லும் இஸ்லாம் மார்க்கம் தான் திருமணம் பேசும் போது சில ஒழுக்கங்களைச் சொல்கிறது. ஏதோ பெண்ணை பார்த்தோம். பேசி முடித்தோம், திருமணம் முடிந்தது என்றில்லாமல் அதற்கென சில ஒழுக்கங்களையும், அதன் முறைகளையும் சொல்லித் தருகிறது.
இன்றுள்ள பெற்றோர்கள் பெண் அழகாகவும், வசதியான இடத்துப் பெண்ணாகவும் இருக்க வேண்டும் என்று தான் நினைக்கின்றார்களே ஒழிய, அவளின் குணநலன்கள், பண்பாடுகள், நாகரீகம், பிறரை மதித்து நடத்தல், இஸ்லாமிய அறிவு என்பது பற்றியெல்லாம் கவனித்து, பெண்ணைத் தேர்வு செய்வதில்லை. இதன் விளைவு பெண் தமிர் பிடித்தவளாகவும், எதிர்த்துப் பேசக் கூடியவளாகவும், குடும்பத்தைக் கவனிக்காமல் பிரச்னை என்றால் தாய் வீட்டிற்கு சென்று விடுபவளாகவும் தான் இருக்கிறாள். இதனால் தான் நமது நாயகம் கண்மணி (ஸல்) அவர்கள் கூறியுள்ளார்கள் :
பெண்ணை அவர்களின் அழகுக்காக (மட்டும்) மணம் முடிக்காதீர்கள். எனெனில் அவர்களின் அழகு அவர்களை அழித்து விடலாம். அவர்களின் செல்வத்துக்காக (மட்டும்) மணமுடிக்காதீர்கள். ஏனெனில் அவர்களின் செல்வம் அவர்களை வழி தவறச் செய்து விடலாம். எனினும் நல்லொழுக்கத்துக்காக அவர்களை மணம் புரியுங்கள். நல்லொழுக்கமுள்ள அழகற்ற கரு நிறத்து அடிமைப் பெண் (நல்லொழுக்கமற்ற அழகிய பெண்ணைவிட) மேலானவள் என்று கூறினார்கள். அறிவிப்பவர் : இப்னு அம்ரு (ரலி) ஆதாரம் : இப்னு ஹிப்பான்.
அதுமட்டுமல்லாமல் அழகு என்பது நிரந்தரமானதல்ல! அது ஒரு விபத்தில் கூட அந்த அழகு அழிந்து விடலாம். பணம் என்பது இன்றைக்குப் போகும் நாளைக்கு வரும். இதையெல்லாம் இவர்கள் கண்களில் பட்டாலும் அதைக் கண்டும் காணாமல் இருப்பார்கள்.
இன்னும் பெண்ணின் பெற்றோர் பெண்களிடம் சம்மதம் கேட்பதேயில்லை. பெண் என்றால் நாம் சொல்வதைக் கேட்கணும். நமக்குக் கட்டுப்பட்டு இருக்கணும், குடிகாரன், விபச்சாரன் என்று தெரிந்திருந்தும், அவனது வசதி வாய்ப்புகளைக் காட்டி, அவனை ஏற்றுக் கொள்ள வேண்டும் என்று நினைக்கிறார்கள்.
அவளும் ஒரு பெண் என்ற வகையில் உணர்வுள்ள மனித வர்க்கம் தானே என்று நினைத்து, பெண்ணின் சம்மதத்தைக் கேட்பதில்லை. அவளுக்கென உணர்வுகள், ஆசைகள் இருக்காதா? என்று நினைப்பதில்லை. இந்த தவறு பொருப்பாளர் முஸ்லிம்களிடம் தான் உள்ளது. ஆனால் நபி (ஸல்) அவர்கள் கூறியுள்ளார்கள்.
கன்னிப் பெண்ணாயினும், விதவை பெண்ணாயினும் சம்மதம் பெற வேண்டுமென்ற போது கன்னிப் பெண் எப்படி சம்மதிப்பாள். வெட்கப்படுவாளே என்று தோழர்கள் கேட்க அவளது மௌனமே சம்மதம் என்று நபி(ஸல்) அவர்கள் கூறியுள்ளார்கள். அறிவிப்பவர் : அபுஹுரைரா (ரலி) ஆதாரம் : புகாரீ, முஸ்லிம்.
சிலர் மணமக்களை காண்பிப்பதில்லை. எங்களுக்கு பழக்கம் இல்லை என்று தட்டிக் கழிப்பார்கள். இதனால் பின்னால் பல பிரச்னைகளை சந்திக்க வேண்டி வரும்.
மணமக்கள் ஒருவரை ஒருவர் பார்த்துக் கொள்ளாத நிலையில், மணமுடிக்கப்படும் திருமணங்களில் சில இன்றைக்கு மணமான அன்றே விவாகரத்துக் கோரும் நிலைக்குச் சென்றுள்ள நிகழ்வுகள் நமது சமுதாயத்தில் நடைபெற்றுக் கொண்டு தான் இருக்கின்றன.
இத்தகைய பிரச்னைகள் சமுதாயத்தில் தலைதூக்காமல் இருப்பதற்கான ஒரே வழி, இறைத்தூதர் (ஸல்) அவர்கள் காட்டித் தந்தபடி மணமக்கள், ஒருவரை ஒருவர் பார்த்திருக்க வேண்டும். ஒருவர் மற்றவரைப் பற்றிய முழுத் தகவல்களையும் அறிந்திருப்பதும் கூட மிகச் சிறந்ததாகும்.
இறைத்தூதர் (ஸல்) அவர்கள் கூறினார்கள் :
ஒரு பெண்ணைத் திருமணம் முடிக்கலாம் என்ற ஒரு மனிதனின் உள்ளத்தில் அல்லாஹ் எழுப்பி விட்டால், அவளைப் பார்த்துக் கொள்வதில் குற்றமில்லை என்று நபி (ஸல்) அவர்கள் கூறினார்கள். அறிவிப்பவர் : இப்னு மஸ்லமா (ரலி) ஆதாரம் : அஹ்மத், இப்னு மாஜா
இன்றைக்கு திருமணத்தில் முக்கிய இடம் வகிப்பது வரதட்சணை என்ற கொடிய வியாதியாகும். வரதட்சணையாக பீரோ, கட்டில், நகை, என்று லிஸ்ட் நீண்டு கொண்டே போகும். சுயமரியாதையை விட்டு மற்றவர்களிடம் கடன் கேட்டு, ஓசி கேடடு மாப்பிள்ளை எதிர்பார்க்கும் வரதட்சணைச் சாதனங்களைக் கொடுப்பார்கள். இதன் மூலம் வரதட்சணை என்ற பெயரில் மாப்பிள்ளை வீட்டார் பெண் வீட்டாரிடம் கௌரவப் பிச்சை எடுக்கின்றார்கள். தானும் ஒரு பெண் தானே, தன் கல்யாணத்தில் எவ்வளவு கஷ்டப்பட்டிருப்பார்கள் என்று சற்றும் மாப்பிள்ளையைப் பெற்ற தாய் நினைப்பதில்லை.
நீங்கள் (மணம் செய்து கொண்ட) பெண்களுக்கு அவர்களுடைய மஹர் தொகையை மகிழ்வோடு கொடுத்து விடுங்கள் என்று இறைவன் கூறுகின்றான். (அல்குர்ஆன் : 4:4)
மகிழ்வோடு கொடுங்கள் என்று கூறுகின்றானே தவிர, மன வேதனையுடன் அவர்களிடமிருந்து நீங்கள் வாங்குங்கள் என்று கூறவில்லை. மஹர் தொகையை 1001, 501 ரூபாய் என்று கொடுக்கின்றார்கள்.அவ்வாறு கொடுக்கக் கூடாது. பெண்ணிடம் மஹர் தொகை எவ்வளவு வேண்டும் என்று கேட்க வேண்டும். வசதியில்லை என்றால் தன் வசதிக்கு ஏற்ற அந்த மஹரை ஏற்றுக் கொள்ளக் கூடிய பெண்ணை மணம் செய்யுங்கள்.
சிலர் பெற்றோர் கட்டாய திருமணம் செய்து வைக்கிறார்கள். இதனால் வாழ்க்கையில் அடிக்கடி பிரச்னை, தலாக், தற்கொலை முயற்சி, தற்கொலை என்று இஸ்லாம் எதிர்க்கின்ற, வெறுக்கின்ற முடிவுகளுக்குச் சென்று விடுகின்றார்கள். கௌரவம், சொந்தம் விட்டுப் போகக் கூடாது, என்ற பல காரணங்களை முன்னிட்டு முடித்து வைக்கப்படும் திருமணங்கள் பல வாழ்நாள் முழுவதும் பிரச்னைகளுடனேயே கழிகின்றது. பிரச்னை முற்றியவுடன் அது ஆபத்தில் கொண்டு போய் சேர்க்கின்றது.
கீதாம் என்பவர் தன் மகளுக்கு பிடிக்காமல் மண முடித்துக் கொடுக்க, இது நபி (ஸல்) அவர்களுக்கு எட்டியது. உடனே இது செல்லத்தக்கதல்ல என்று கூறினார்கள். பின் அப்பெண் வேறு ஒருவரை மணமுடித்துக் கொண்டாள். அறிவிப்பவர் : இப்னு அப்பாஸ் (ரலி) ஆதாரம் : அபூதாவூத், ஹாகிம்
பெற்றோர்களே! உங்கள் மானப்பிரச்னை, கௌரவப் பிரச்னை என்றும் அழகு பணம் என்றும் உங்கள் பிள்ளைகளின் மனதைப் புரிந்து கொள்ளாமல், நோகடிப்பதை விட பிள்ளைகளின் மனதைப் புரிந்து கொண்டு நல்ல பெற்றோர்களாகவும், நல்ல மாமியார்களாகவும் நடந்து கொள்க.